Արամեն առաջիկայում նոր տեսահոլովակ կներկայացնի, մինչեւ օգոստոս պլանավորված են համերգներ արտերկրում, բացի այդ իր հեղինակային երգը շուտով կկատարի երգչի ընտրյալը` Աննա Թովմասյանը:
"Դեռ չի ձայնագրվել, բայց երգը պատրաստ է: Ես դեմ չեմ, որ նա երգի, թեեւ երբեք էլ չեմ թաքցրել՝ չեմ ցանկանա ինձ պես շատ զբաղված լինի գործերով: Իսկ այս ժամանակաշրջանում բուռն աշխատանք չենք կատարում”,-BRAVO.am-ի հետ զրույցում ասել է Արամեն:
Հիշեցնենք, որ երգչի ընտրյալն ունի ընդամենը մեկ երգ` "Խոսքերն ավելորդ են”: Իսկ սիրելիի՝ իրեն նվիրած երգի մասին աղջիկը դեռ նախորդ տարի էրպատմել:
Արամեն հերքել է այն խոսակցությունները, թե ինքն ու Աննան իբր գաղտի նշանվել են. "Եթե որոշենք նշանվել, չենք թաքցնի, քանի որ չեմ կարծում` վատ արարք է, որը ես պետք է անեմ ու գաղտնի պահեմ: Մեծ սիրով կհայտնեմ իմ նշանադրության մասին, սպասենք այդ օրվան: Արամեն այժմ պատրաստվում է հերթական տեսահոլովակի նկարահանմանը. "Մինչեւ ամսվա վերջ պատրաստ կլինի. ուրախ, աշխույժ երգ է: Հաճախ տրամադրությունս փոխվում է, օրինակ` հիմա բարձր տրամադրություն ունեմ, գարնանային նոր լիցքեր եմ ստացել, ավելի ուրախ երգեր եմ երգում”:
BRAVO.am-ը նաեւ տեղեկացրել է, որ երգչն այժմ համագործակցում է Արտյոմ Հակոբյանի հետ, որն իր համերգային տնօրենն է: "Տարվա վերջում նախատեսում ենք շատ գեղեցիկ համերգ, չնայած՝ տարվա ընթացքում եւս կմասնակցեմ համերգների: Դեռ հաստատ որոշված չէ, բայց հնարավոր է` մենահամերգներ ունենամ Միացյալ Նահանգներում”,- նշել է նա:
"Իմ կյանքի կարեւոր մրցանակներն արդեն ստացել եմ”. Արամե Առաջիկայում կմասնակցի՞ մրցանակաբաշխությունների, երգիչը դեռ հստակ չգիտի. "Երբ մի քանի մրցանակաբաշխություն է լինում, մի տեսակ ամեն ինչ կրկնվում է… Մրցանակների քանակը չէ, որ պետք է որոշի ինչ-որ բան, կարծում եմ` ժողովրդի սերն է ինձ որպես երգիչ պահում, քան մրցանակները: Ինձ համար մի քիչ ամոթ է վազել մրցանակների հետեւից. իմ կյանքի կարեւոր մրցանակներն արդեն ստացել եմ, հիմա կարեւորն այդ ամենը պահելն ու գնահատելն է”:
Արամեի հավաստմամբ` իր գործընկերների հետ չի մրցակցում, լարվածություն չի ստեղծում. "Մենք բոլորս ընկերներ ենք, կցանկանայի, որ բոլորի մոտ էլ ամեն ինչ ստացվեր, բոլորը լինեին սիրված, պահանջված: Գիտեմ` դա ինչ է երգչի համար: Հաջողություն այն մարդուն, որը սիրում է երաժշտությունը, ոչ թե երգում է, որ ուղղակի իրեն փողոցում ճանաչեն”:
|